Одьулууннар кэнсиэрдэрэ үрдүк таһымҥа ааста.
Арассыыйаҕа норуоттар сомоҕолоһууларын, Өрөспүүбүлүкэбитигэр култуура, улууспутугар олохтоох оӊорон таһаарыы сылларын чэрчитинэн «Айхаллан, Чурапчы» уус-уран самодеятельноһы көрүү бэстибээлэ үрдүк таһымӊа ааста. Сааскы ылааӊы күннэргэ улууспут талба талааннаахтара хас биирдии нэһилиэккэ үтүө түһүлгэни түстээтилэр.
Икки бөлөҕүнэн Дьүүллүүр Сүбэ түөрт күн устата нэһилиэктэри кэрийэн уран тарбахтаахтар быыстапкаларын уонна академическэй кэнсиэри сыаналаата. Бэрэссэдээтэллэринэн Чурапчы улууһун култуураҕа салалтатын салайааччытын солбуйааччы Сусанна Дьячковская уонна И.Н.Винокуров аатынан «Айылгы» Норуот айымньытын дьиэтин норуот айымньытын салаатын салайааччы Елена Дьячковскаяүлэлээтилэр. Маны тэӊэ, уопуттаах, тыа сиригэр буһа-хата үлэлээбит, култуура эйгэтин ис туругун билэр, элбэх сыл бэстибээли сыаналаабыт компетентнэй чилиэттэр киирдилэр.
Тэрийээччилэр быйыл быыстапкаҕа туос оӊоһугу ирдээбиттэрэ. Ааттаах-суоллаах туосчуттартан саҕалаан сана саҕалааччыларга тиийэ олус сиэдэрэй айымньылар турбуттар. Быыстапка муӊутуур оӊоһугунан саар ыаҕас буолла. Балаһыанньаны тутуһан нэһилиэк барыта саар ыаҕаһын сүрэхтээтэ. Эрдэтээӊӊи сылларга быыстапка тоҕус көрүӊү барытын хабар эбит буоллаҕына, бэтэрээ сыллартан биирдиилээн көрүӊү сайыннарыыга ирдэбил турбута. Эһиилги бэстибээлгэ мас оӊоһуктары көрүү былааннанар.
Кэнсиэр таһыма бары нэһилиэккэ олус үрдээбит. Бүтэһик уон сылга миэстэлэспэт нэһилиэктэр инники күөӊӊэ тахсаннар үөрүү икки бүк буолла. Манна сүрүн төрүөт элбэх, Култуура да сылынан дьон-сэргэ санаата көнньүөрбүт буолуон сөп. Ол гынан баран, бастакынан, сөптөөх каадырдар бэйэлэрин миэстэлэрин булан үлэлии-хамсыы, айа-тута сылдьалларын бигэргэтэр. Биллэн турар, биир сыллаах үлэ түмүгэ буолбатах.
Түмук маннык таҕыста: Одьулуун уонна Арыылаах нэһилиэктэрэ бастаатылар, Хатылы уонна Кытаанах нэһилиэктэрэ иккистээтилэр, Хоптоҕо уонна Бахсы нэһилиэктэрэ үһүс буоллулар.
