В.Н.Егоров- Тумарча төрөөбүт дьиэтигэр сайыҥҥы литературнай музей.
Бэс ыйын 14 күнүгэр Одьулуунтан төрүттээх ССРС Суруйааччыларын сойууһун чилиэнэ, Россия уонна Саха сирин Суруйааччыларын сойууһун чилиэнэ, Саха Өрөспүүбүлүкэтин култууратын үтүөлээх диэйэтэлэ, Саха Өрөспүүбүлүкэтин оҥорон таһаарыы эйгэтигэр Государственнай бириэмийэтин лауреата, Өксөкүлээх Өлөксөй аатынан Саха Өрөспүүбүлүкэтин Государственнай бириэмийэтин лауреата, Чурапчы улууһун уонна Одьулуун нэһилиэгин бочуоттаах олохтооҕо, Российскай Федерация Парламенын бэлиэтин хаһаайына, Саха Өрөспүүбүлүкэтин норуодунай суруйааччыта Василий Назарович Егоров- Тумарча Халтаҥ алаастан көһөрүллэн кэлбит, төрөөбүт үөскээбит олорбут дьиэтигэр сайыҥҥы литературнай музей курдук оҥорон, анал бэлиэ сурук аһыллыытын үөрүүлээх чааһа буолла.
Тэрээһин үөрүүлээх чааһыгар Одьулуун нэһилиэгин тыа сирин түөлбэтин дьаһалтатын баһылыга Людмила Васильевна Ефремова, музыка үрдүкү оскуолатын профессора Ольга Михайловна Харайбатова, нэһилиэк ытык мааны кырдьаҕастара, бииргэ төрөөбүт балта Татьяна Назаровна, хаан-уруу аймахтара. Тэрээһини өр сылларга библиотекарынан үлэлээбит Саха Өрөспүүбүлүкэтин култууратын туйгуна Анна Романовна Аржакова иилээн-саҕалаан ыытта. Литературнай музей ис бараанын оскуола учууталлара, үлэһиттэрэ, модельнай библиотека сэбиэдиссэйэ Софья Александровна оҥордулар.
Кэлбит дьон-сэргэ бары үөрэн-көтөн, маннык хамсааһыны сэҥээрэн, махтанан, Василий Назаровичка саха алмааһыныы чэгиэн доруобуйаны, сүһүөҕүҥ үрдүгэр сүүс сааскар тиий диэн алгыс тылларын анаатылар.
Ол курдук, киирээти кытта төрөппүттэриттэн хаалбыт хоппо, туос ыаҕыйалар, чабычахтар, тымтайдар ааспыт олоҕу кэрэһэлии кэчигирээн тураллар. Үлэлиир хоһугар суруйааччы төрдүн-ууһун, олоҕун, айар үлэтин кэпсиир стендэлэр, хаһыат балаһалара бааллар. Көрөөччү болҕомтотун 6 QR-код тардар. Манна норуодунай суруйааччы 1993 сыллаахха уһуллубут «Аал Луук мас» передача, «Одьулууннар» аудиокинигэ, быйылгы 90-сааһынан ыытыллыбыт НПК уо.д. а. матырыйааллары көрүөххэ, ааҕыахха сөп. Дьиэ биир эркинэ суруйааччы бэйэтэ муспут, автографтаах бэлэх ылбыт кинигэлэрэ полкаҕа кэчигирэһэн тураллар. Остуолга суруйааччы 10-тан тахса кэпсээн, сэһэн, роман кинигэлэрэ тэлгэнэн сыталлар. Дьиэ эркиннэрин Саха сирин мааны, айылҕата ойууламмыт хартыыналар харахха быраҕыллан, дьиэни-уоту ситэрэн биэрэллэр.
