Олунньу 28 күнүгэр «Төрөппүттэрбит олохпут суолун сырдаталлар» кинигэ биһирэмэ буолан ааста.
Үлэ уонна тыыл бэтэрээннэрэ Мотрена Спиридоновна, Мария Михайловна, Николай Михайлович Капитоновтар сырдык ааттарын үйэтитэр ахтыы кинигэ сүрэхтэниитин түгэннэриттэн.
Биһиги эһэлэрбит, эбэлэрбит, төрөппүттэрбит сэрии, сут-кураан, алдьархайдаах сылларын, үтүмэн үгүс кыһалҕаларын, ыар кытаанах үлэни илэ харахтарынан көрбүт дьон буолаллар. Кыайыы туһугар саҥа улаатан эрэр оҕолор, бэйэлэрин харыстаммакка улахан дьону кытта тэҥҥэ үлэлээн, көмөлөһөн кыайыыны аҕалсыбыттара. Саҥа эйэлээх олоххо төрөөбүт дойдуларыгар, тыа хаһаайыстыбата сайдарыгар, атын да үлэлэр чөллөрүгэр түһэллэригэр кырата суох кылааттарын киллэрэн кэллэхтэрэ. Кинигэ киирии тылыттан, Мотрена Николаевна Попова суруйуутуттан.
Олохторун оҥостоллоругар төһүү күүс буолбут ытыктыыр, таптыыр үтүө санаалаах эбэлэрэ Мотрена Спиридоновна, күн курдук күндү ийэлэрэ Мария Михайловна, амарах аҕалара Николай Михайлович Капитоновтар тустарынан оҕолоро, сиэттэрэ билиннэр «Төрөппүттэрбит олохпут суолун сырдаталлар” диэн ийэбит Мария Михайловна 95 сааһыгар ананан тахсыбыт ахтыы кинигэ күн сирин көрдө. Кинигэни хомуйан оҥордулар оҕолоро Хатылы нэһилиэгин “Оскуола иннинээҕи үөрэҕирии 100 сылынан бэлиэ хаһаайына” Мотрена Николаевна Попова, «Идэҕэ бэриниилээх» знак хаһаайына Надежда Николаевна Сергеева, уоллара Устин Николаевич Капитонов.
Кинигэбит халын тастаах, тупсаҕай оҥоһулаах, 134 страницалаах быйыл тохсунньу ыйга «Компания “Дани-Алмас» типографияҕа 33 экземплярынан бэчээттэнэн таҕыста. УДК, ББК, авторскай шифрдаах. Кинигэ иһинээҕитэ кэрчик-кэрчик ахтыылартан турар, Мотрена Спиридоновна, Мария Михайловна, Николай Михайлович Капитоновтар, оччотооҕу кэминээҕи, дьиэ-кэргэттэрин, аймахтарын туһунан көрдөрөр-кэпсиир, өҥнөөх хаартыскалар кинигэбит ис хоһоонун ситэрэн биэрэр.
