Одьулуун нэһилиэгэр үлэлии сылдьыбыт библиотекардар ахтыылара
Прокопьева Вера Львовна, 1958 с. Дьокуускайга культурнай сырдатар оскуоланы бүтэрэн, Одьулуун сельскай библиотекатыгар үлэлии кэлбитэ. Библиотека бастаан приклубнай этэ. Ону кинигэлэрин инвентарнай сурунаалга суруйан тыһыынчаттан тахса кинигэ буолбута, иннэ гынан сельскай библиотека оҥорбуттара. Оччолорго библиотекаҕа үлэлииргэ усулуобуйа суоҕа, Сэбиэт үлэлиир хоһугар ыскааптаах эрэ этибит. Онтон кэлин ыал дьиэтигэр биир кыра хоско көһөрбүттэрэ. 1959 с. саҥа кулууп тутуллан, онно биир хоһу биэрбиттэрэ. Хоһум наһаа кыараҕас этэ. Почтаҕа кэлбит нэһилиэк хаһыаттарын, сурунаалларын аадырыстаан нэһилиэк суруппут дьонугар түҥэтэрим. Хаһыат сурутуутун эмиэ библиотекарь үлэтин курдук саныыллара, хас да сыл хаһыакка, сурунаалга сурута сылдьыбытым. 1963 с. хаһыакка, сурунаалга сурутан партия обкомуттан грамота ылбыттааҕым. Хас да фермаҕа кинигэ таһарым. Ыйдааҕы былааннааҕым уонна ыйга төһөнү ыабыттарын ый аайы көрдөрүү оҥорон ыйыырым. 1969с. доруобуйабынан уонна дьиэбэр табыллыбат буолан, сельскэй библиотекаттан тохтообутум. Кэлин күһүнүгэр оскуола библиотекатыгар көспүтүм. 1982с. диэри интернакка баспытааталынан, оскуола буфетыгар үлэлээбитим. 1982с. балаҕан ыйыттан пенсияҕа олоробун. Сельскэй библиотекаҕа үлэлиир сылларбар II төгүл нэһилиэк Сэбиэтигэр депутатынан талылла сылдьыбытым- 1967с. уонна 1969 сылларга.
Вера Львовна Прокопьева үлэ ветерана, Хоту көһөрүү кыттыылааҕа,
Кыайыы 60 сылынан юбилейнай бэлиэ,
«Одьулуун нэһилиэгин сайдыытыгар кылаатын иһин» бэлиэ наҕараадалардаах.
Варвара Петровна Полятинская 1939 сыл ахсынньы 18 күнүгэр Кэбээйи оройуонун Тыайа нэһилиэгэр холкуостаах дьиэ-кэргэҥҥэ күн сирин көрбүтэ. 1960 сыллаахха Тыайаҕа олохтоох библиотекаҕа сэбиэдиссэйинэн икки сыл үлэлээбитэ. 3 сыл устата ситиһиилээхтик үөрэнэн, 1966 сыллаахха специалист быһыытынан үлэтин Феоктист Романович Софроновы кытта Одьулууҥҥа саҕалаабыта. Бастаан икки ый библиотекарынан, онтон кулууп сэбиэдиссэйинэн ананан үлэлээбитэ. Онтон, 1971 сыл кулун тутар ыйыгар Одьулуун нэһилиэгин дьоно-сэргэтэ аҕабытын нэһилиэк Сэбиэтин председателинэн быыбардааннар, төттөрү дойдуларыгар көһөн кэлэн дьиэ-уот туттан олохсуйбуттара. Төннөн кэлэн баран ийэбит идэтинэн 4 сыл устата нэһилиэккэ библиотека сэбиэдиссэйинэн үлэлээбитэ.
Марина Феоктистовна Федотова тохсунньу 2020 сыл.
1972 сыл күһүнүгэр Ленин аатынан холкуос Үрэх Күөрэтээҕи учаастагар библиотекарынан ананан тиийбитим. Библиотеканы кинигэ фондата сөрү-сөпкө батар гына хос быһаннар, онно үлэлээбитим. Библиотека үлэтигэр хас квартал аайы эбэһээтэлинэй тематическай биэчэрдэр, депутаттар, читательскай конференция, предвижной библиотека үлэлэрэ ирдэниллэрэ. 1974 сыллаахха холкуоспут Карл Маркс аатынан сопхуос буола улаатан, кулууппут аны сопхуос киин хонтуоратыгар кубулуйбута. Сопхуос дириэктэрэ Макаров Семен Петрович, партком сэкирэтээрэ Оконешников Михаил Степанович, рабочком председателэ Дьяконов Лука Афанасьевич биһиги үлэбитигэр мэлдьи көмөлөһөр, интириэһиргиир этилэр. Библиотекабыт диэхтээн арааһа 2,5×5 м буолара дуу, суоҕа дуу. Читальнай зал диэн суоҕа, быыстапка да оҥорор усулуобуйа суоҕун тэҥэ этэ. Ол да буоллар сыллааҕы былааммын, маассаны кытта үлэбин син толорор этим. Ыытар библиотечнай-маассабай үлэбэр куруутун көмөлөһөр, күүс-көмө буолар дьоннорунан олохтоох СПТУ-13 преподавателлэрэ Дмитрий Николаевич Гаврильев, Михаил Прокопьевич Ефимов, Алексей Афанасьевич Афанасьев, Никифор Николаевич Ермолаев, оскуола учууталлара Мария Михайловна Иванова, Петр Федорович уонна Петр Афанасьевич Старостиннар, Александра Семеновна Пинигина, Александра Николаевна Мандарова уо д.а. буолаллара. Салгыы отделение салалтата детсад эргэ дьиэтигэр көспүтэ. Библиотека аҕыйах кэмҥэ бухгалтерия хоһугар кэҥэтинэн көспүтэ. Ол кэмҥэ шефтээхтэрбитигэр, Нерюнгриларга сакаастаһан саҥа тимир книжнай стеллаж ылбыппыт. Онтон библиотекабын отделениены уонна сельсоветы кытта бииргэ хонтуора дьиэҕэ көһөрбүттэрэ. Библиотекаҕа үлэлиир кэммэр уборщицанан Седалищева Мария. Кулууппутугар өссө нэһилиэк АТС-һа баара. Онно Ефремов Н.Д. үлэлиирэ. Ол АТС-ка турар радиоузелтан нэһилиэнньэ истиитигэр биллэриилэри биэрэрбит.
Татьяна Васильевна Седалищева- Моттуева
Мин Одьулууҥҥа 1986 сыллаахха саас, муус устар бүтүүтүн диэки, библиотекарь суоҕунан, үлэлии тиийбитим. Ол кэмҥэ сэбиэтинэн Колесов Гаврил Семенович, кулуупка дириэктэринэн Михаил Оконешников, худругунан Попова Мария Прокопьевна үлэлииллэрэ. Олус көхтөөхтүк үлэлээбиппит. Мария Прокопьевна миэхэ элбэхтик көмөлөспүтэ, сүбэ-ама буолара. Киниэхэ махталым муҥура суох. Библиотека кулууп дьиэтигэр син кэҥэс хоско баара. Ити кэмҥэ кулууп үлэтин ыкса билсибитим. Бары көмөлөөн, сүбэлэһэн үлэлиирбит. Мин сценарийдарын суруйан көмөлөһөрүм. Библиотеканы кэҥэтэн, оҕолорго аналлаах хас оҥоруохпун баҕарарым, ону өйдөөннөр кулууптарым бэйэлэрин метод-хосторун туран биэрбиттэрэ. Чурапчы библиотекатын художнига Михаил Егасовы ыҥыран, тупсаҕай, оҕоҕо сөптөөх долбуурдары, дьэрэкээн уруһуйдары оҥорторбутум. Бастаан кэлэрбэр библиотека өр өрөмүөннэммэтэҕэ биллэрэ. Истиэнэтин сыбаҕа дэлби түспүт, кырааската өлбөөрөн, көстүүтэ бэрдэ суоҕа.
Одьулуун наһаа сэргэхтик, түмсүүлээхтик олорор нэһилиэк дии саныыбын. Кырдьаҕастан оҕотугар тиийэ библиотека аанын саппаттар этэ. Ааҕалларын олус сөбүлүүллэрэ. Күһүн уоппускаттан кэлэрбин ааҕааччылар кэтэспит аҕай буолаллар. Аныгы тылынан эттэххэ, социальнай партнердарым элбэх этилэр. Оскуола, детсад, СПТУ-13 бу улахан тэрилтэлэри кытта ыкса, кыттыһан үлэлээбиппит. Одьулууҥҥа үлэлээбит кэмнэрбин олус истиҥник саныыбын, олохтоохтор, ааҕааччыларым амарах сыһыаннарын иһин ис сүрэхпиттэн махтанабын.
Саргылана Романовна Седалищева
Одьулууҥҥа 1989 с. Кемероватааҕы культура государственнай институтун бүтэрэн үлэлии кэлбитим. Үлэбин Кугдарова Саргылаана Романовнаттан туппутум. Оччолорго хас биирдии кинигэтигэр тиийэ наардаан-суоттаан тутуһар. Икки ыйы быһа библиотекаҕа дириэктэринэн Калачева Мария Николаевна, онтон Картузова Дария Ивановна үлэлээбиттэрэ. Чурапчы оройуонугар аан бастаан кэлбит киһиэхэ библиотека үлэһиттэрэ бары күүс-көмө буолбуттара. Библиотека күнүс 12 чаастан киэһэ 8 чааска диэри үлэлиирэ.
Оҕо ааҕар саалатыгар анаан эбии хос биэрбиттэрэ. Иван Львович Колесов уруһуйдаан, киэргэтэн биэрбитэ онно үчүгэй баҕайытык оҥостон үөрбүтүм. Библиотекаҕа олохтоохтор да, оҕолор да, СПТУ устудьуоннара даҕаны көхтөөхтүк сылдьаллара. Оҕолор саамай сөбүлээн көрөллөрө “Крокодил” диэн юмористическай сурунаал этэ. Хос-хос көрөн үөрүү-көтүү бөҕө буолааччылар. Биллиилээх дьон да буолбуттарыттан буолуо эбэтэр оччолортон киһи хараҕар быраҕыллар да эбиттэрэ дуу, Турантаев Генаны наһаа өйдүүбүн. Волков “Волшебник изумрудного города”, “Урфин Джюс и его деревянные солдаты” уо.д.а. көрдөөн туран ааҕалларын өйдүүбүн. Саҥа кинигэ кэлэрин кэтээн туран кэлэн суруйтаран ылааччылар. Сурунаа, хаһыат көрө тиһигин быспакка сылдьааччылар.
Елена Аркадьевна Корякина,
Мэҥэ Хаҥаластааҕы И.М.Сосин аатынан кииннэммит библиотека информационнай библиографическай отделын сэбиэдиссэйэ.