Ааспыт нэдиэлэтээҕи солуннар
Балаҕан ыйын 13 күнүгэр «Сохраняя традиции, создаем будущее!» Саха Өрөспүүбүлүкэтин Национальнай библиотека 100 сылынан, единай медиа уруок буолла, кыттыыны ыллылар 8,9,10,11 кылаас Одьулуун орто оскуолатын үөрэнээччилэрэ. Оҕолор видеоматериалы сэҥээрэн көрдүлэр, ыйытыктарга хоруйдаатылар.
Нэһилиэкпитигэр Күүс өттүнэн Хоту Көһөрүллүү 83 сылыгар, митинг уонна мемориальнай дуоска аһыллыыта буолла.
Одьулуун нэһилиэгин хоту көһөрүү историятыттан сэгэтэн
Олоххо буолан ааспыт хайа баҕарар кэрдиис кэм, дьон – сэргэ билиитигэр тахсыбатаҕына умнууга хаалар дьылҕаланар. Саха сирин устуоруйатыгар биир хара мэҥ быһыытынан ылыныллыбыт, Чурапчы эрэ буолбакка, Саха сирин бүтүннүүтүн “алдьархайынан” билиниллибит Чурапчы 41 холкуоһун 1942 сыллаахха хоту оройуоннарга күүс өттүнэн көһөрүү ыытыллыбыта быйыл 80 сыла. Көһөрүллүү саҕана Одьулуун нэһилиэгэ 4 холкуостааҕа: “Карл Маркс”, “Трактор”, “Орджоникидзе” уонна “Төҥүргэстээх”. Одьулуун нэһилиэгэ оройуоҥҥа биир бөдөҥнөрө этэ. Одьулуун икки холкуоһа – Бабаҕаҕа олохтоох Орджоникидзе аатынан холкуостан барыта 234 киһилээх 97 хаһаайыстыба уонна“Төҥүргэстээх” холкуостан, 90 киһилээх 37 хаһаайыстыбалаах, Кэбээйи оройуонугар көһүүгэ баран Куокуй нэһилиэгэр “Кальвица” холкуоска холбоһон Борҕо диэн сиргэ олорбуттара.1942 сыл күүс өттүнэн хоту көһөрүллүү үгүс дьон дьылҕатыгар ыар содулламмыта, хаарыаннаах аймах-хаан дьоммут көмүс уҥуохтара Кэбээйи, Эдьигээн, Булуҥ хоннохторугар үйэ –саас тухары хаалбыттара. «Киһи кэриэстээх, сурт төҥүргэстээх» диэн өбүгэлэрбит күн сирин үрдүгэр төрөөн-үөскээн сылдьыбыт киһи аата-суола, сураҕа суох сүппэтин туһунан төлкөлөөн өс хоһооно оҥостоллоро. 1992 сыллаахха Одьулуун сиригэр-уотугар Баһылай алааһыгар хоту көһөрүллүү 50 сылынан памятник тутуллубута. Салгыы хоту көһөрүллүү 70 сылыгар 2012 сыллаахха гранит тааска “Орджоникидзе” холкуостар 234 киһи аата суруллан үйэтитиллибитэ. Төрөөбүт дойдутун хоту оройуоннарга күүс өттүнэн көһөрүллүү 70 сылынан Николай Иванович Ефимов хоту көһөрүллүү кыттыылааҕа Бабаҕалар кинигэни бэчээттэтэн таһааттарбыта. Нэһилиэкпит музейын общественнай үлэһитэ Евдокия Егоровна Окорокова 2 холкуостар истиэндэлэрин оҥорон үйэтитии улэтин ыыппыта. Ону таһынан 23 киһи көһөрүллүү кыттыылаахтара Одьулууҥҥа кэлэн олохсуйбут дьон истиэндэтэ эмиэ оҥоһуллубута. Нэһилиэкпитигэр сылын ахсын кэриэстэбил күнүн ахтан –санаан ааһабыт Көһөрүллүүгэ сылдьыбыт дьоммут – сэргэбит элбэх кэнэҕэски ыччаттардаахтар, кинилэр бу курдук төрүт дьоннордоох эбиппит, дойду курдук дойдулаахпыт, ыарахаҥҥа быһаарсар духуобунай салайааччылардаахпыт диэн бөҕөтүк сананныннар диэн ахтан санаан ааһар хайаан да наада. Аны Көһөрүллүү курдук алдьархай аны хаһан да хатыламматын, оҕолорбут, сиэннэрбит, кэнэҕэски кэлэр ыччаттарбыт эйэлээх халлаан, көҥүл сайдыы күнүн анныгар көҥүл көччүйэ олордоллор диэн баҕа санаалаахпыт.
Аан дойдутааҕы IV библиографическай конгресс
📘📗📙Дьокуускай куоракка IV норуоттар икки ардыларынааҕы библиографическай конгресс 13 хайысханан үлэтин ыытта. Конгресс секциялара СӨ Национальнай библиотекатыгар, СӨ наукатын академиятыгар, Арктикатааҕы судаарыстыбаннай култуура уонна ускуустуба институтугар, М К. Аммосов аатынан ХИФУ научнай библиотекатыгар уонна Н. Д. Неустроев аатынан СМАРТ библиотекаҕа ыытылла тураллар.Киэҥ ис хоһоонноох , дириҥ научнай хабааннаах тэрээһиннэри сэргэ маастар кылаастар, төгүрүк остуоллар, ырытыылар буоллулар. Бэлиэтээн эттэххэ бу улахан конгресска Россия 81 регионуттан уонна 16 тас дойдуттан кыттыыны ыллылар.
