Суруйааччы олорбут дьиэтигэр, киирээти кытта төрөппүттэриттэн хаалбыт хоппо, туос ыаҕыйалар, тымтайдар ааспыт олоҕу кэрэһэлии кэчигирээн тураллар…
Былырыын 2025 сыллаахха, бэс ыйын 14 күнүгэр Одьулуунтан төрүттээх ССРС Суруйааччыларын сойууһун чилиэнэ, Россия уонна Саха сирин Суруйааччыларын сойууһун чилиэнэ, Саха Өрөспүүбүлүкэтин култууратын үтүөлээх диэйэтэлэ, Саха Өрөспүүбүлүкэтин оҥорон таһаарыы эйгэтигэр Государственнай бириэмийэтин лауреата, Өксөкүлээх Өлөксөй аатынан Саха Өрөспүүбүлүкэтин Государственнай бириэмийэтин лауреата, Чурапчы улууһун уонна Одьулуун нэһилиэгин бочуоттаах олохтооҕо, Российскай Федерация Парламенын бэлиэтин хаһаайына, Саха Өрөспүүбүлүкэтин норуодунай суруйааччыта Василий Назарович Егоров- Тумарча «Халтаҥ» алаастан көһөрүллэн кэлбит, төрөөбүт үөскээбит олорбут дьиэтигэр сайыҥҥы литературнай музей оҥоһуллан, анал бэлиэ сурук ыйаммыта. Ол курдук, киирээти кытта төрөппүттэриттэн хаалбыт хоппо, туос ыаҕыйалар, чабычахтар, тымтайдар ааспыт олоҕу кэрэһэлии кэчигирээн тураллар. Үлэлиир хоһугар суруйааччы төрдүн-ууһун, олоҕун, айар үлэтин кэпсиир стендэлэр, хаһыат балаһалара бааллар. 6 QR-код норуодунай суруйааччы 1993 сыллаахха уһуллубут «Аал Луук мас» передача, «Одьулууннар» аудиокинигэ, былырыын 90-сааһынан ыытыллыбыт НПК уо.д. а. матырыйааллары көрүөххэ, ааҕыахха сөп. Дьиэ биир эркинэ суруйааччы бэйэтэ муспут, автографтаах бэлэх ылбыт кинигэлэрэ полкаҕа кэчигирэһэн тураллар. Остуолга суруйааччы 10-тан тахса кэпсээн, сэһэн, роман кинигэлэрэ тэлгэнэн сыталлар. Дьиэ эркиннэрин Саха сирин мааны, айылҕата ойууламмыт хартыыналар харахха быраҕыллан, дьиэни-уоту ситэрэн биэрэллэр.
Норуодунай суруйааччыбыт олорбут дьиэтин-уотун, туттубут малын-салын, билиһиннэрэр сыалтан оскуолабыт үөрэнээччилэригэр сырдатыы, иһитиннэрии литературнай уруок быһыытынан ыытыллынна.
